Comunicado de Lagares Vivo por mor da vaga de lumes

Dende Lagares Vivo queremos expresar a nosa total solidariedade cos milleiros de galegas e galegos que están a sufrir as dramáticas consecuencias desta irracional vaga de incendios forestais que asolan o país, así como os veciños de Portugal e Asturias. É, pois, o momento de apoiar os esforzos de todas e todas para rematar con esta situación, sen esquecer, que, máis pronto que tarde, cómpre unha profunda reflexión colectiva sobre que modelo de monte queremos e sobre a necesidade de mudar profundamente nefastas políticas forestais que se teñen amosado indolentes para atallar o problema dos lumes, máxime cando este adquire un cariz ata agora descoñecido no marco do cambio climático global.

Imagen Arde Galicia
Coma sempre, o mellor desta situación é a afouteza e xenerosidade dos galegos e galegas que, dende o persoal dos servizos de emerxencia ata as veciñas e os veciños, contribuíron a que o desastre non fose maior. Fainos enorgullecernos de pertencer a este grande pobo galego.
Anuncios

Marea de Vigo leva ao pleno do Concello as propostas de Lagares Vivo, Equo e Os Verdes sobre o río.

O pasado 21 de decembro o grupo muncipal de Marea de Vigo levou a voz da nosa asociación ao pleno do Concello presentando as propostas que, conxuntamente con Equo e Os Verdes, viñemos preparando nos últimos meses co obxectivo de recuperar e rexenerar o noso maltratado río.

Resultado de imaxes para marea de vigo

Queremos agradecerlle ao grupo municipal da Marea de Vigo a oportunidade que nos deu de facer chegar ao goberno municipal todo o que vimos reclamando dende os nosos inicios coma asociación.

A continuación podedes consultar o texto íntegro da moción presentada:

mocion-lagares

E a nova relacionada aparecida no Faro de Vigo:

Marea de Vigo exige recuperar el río Lagares.

LAGARES VIVO, EQUO – GALICIA E OS VERDES – GALICIA FEDERACIÓN SOLICITAN EN AUGAS DE GALICIA A PARALIZACIÓN INMEDIATA DAS OBRAS DO CAMIÑO DO LAGARES REALIZADAS POLA COMUNIDADE DE MONTES DE CABRAL

As tres organización vimos de presentar unha denuncia conxunta en Augas de Galicia solicitando o cese das obras por mor do incumprimento das condicións impostas á Comunidade de Montes de Cabral no permiso concedido polo organismo autonómico.
Estamos de acordo en que se faga un paseo peonil para devolver ao uso público un espazo que nunca debeu ser de uso privado. Pero ao noso entender existen na actualidade outros modelos construtivos que alteran menos o entorno, cuxo resultado é máis natural e atractivo que o tipo de obras que se están a facer.
As obras estánse a efectuar de xeito destrutivo coa contorna do río, supoñendo unha agresión evidente ao ecosistema fluvial na súa parte alta, xusto a zona na que presenta un mellor grao de conservación.
Concretamente, solicitamos a paralización baseándonos nos seguintes puntos:
1. Non se están a respectar os 5 metros de servidume a ambas as dúas marxes do río, medidos a partir do punto de máxima enchente, construíndose muros de contención mesmo a menos de 1 metro do Lagares.
2. Incúmprese a prohibición expresa de cortar a vexetación de ribeira na mesma franxa de 5 metros, xa que se está a efectuar unha corta sistemática da mesma.
3. Non se está tendo en conta tampouco a prohibición de depositar áridos na zona de servidume, acumulándose 30 cm por riba de calquera medio de retención, favorecendo a caída deste material ao leito do río.
4. A construcción de muros totalmente verticais de pedra de mamposteria nas marxes do rio, que encouzan o rio e modifican e estreitan totalmente as súas ribeiras naturais, incumpre as características técnicas do proxecto para o que Augas de Galicia concedeu o permiso.

Lagares Vivo colabora co proxecto de investigación de AXICA – Colexio Alborada

A Asociación de Xóvenes Investigadores do Colexio Alborada de Vigo , AXICA, encetou coa colaboración da nosa asociación un interesante proxecto de investigación cuxo obxectivo é estudar as sucesións planctónicas en dous puntos distintos do río Lagares. O proxecto está tutorizado polo profesor de Ciencias Naturais Alberto García Mallo e levado a cabo por alumnos de 3º e 4º de ESO co apoio de ex-alumnos do centro.

IMG_20160813_123905142
O reponsable do proxecto, Alberto García, con alumnas do centro e un membro da directiva de Lagares Vivo dispostos a realizar o primeiro dos fondeos.

Para a realización do estudo, escolléronse dous puntos do río, un con clara influencia mariña e outro coa influencia máis atenuada. Fondeáronse mortos de 40-60 cm con cada captador, 6 en total, coa fin de ir extraendo un cada mes e logo proceder á súa análise no laboratorio, para o cal contamos coa colaboración do ECIMAT (Estación de Ciencias Mariñas de Toralla, dependente da Universidade de Vigo). A realización dos traballos conta, ademais, cos preceptivos permisos de Augas de Galicia e Costas. O fondeo dos captadores tivo lugar o pasado sábado 13 de agosto.

IMG_20160813_123038185
Imaxe dos captadores empregados.

O traballo preténdese presentar á feira Galiciencia de Ourense en novembro e á Exporecerca de Barcelona en marzo, así coma ao concurso esdelibro.es en maio de 2017.

Día Mundial do Medio Ambiente 2016

Co gallo da celebración do Día Mundial do Medio Ambiente o próximo domingo, 5 de Xuño de 2016, Os Verdes – Galicia Federación, Equo – Galicia, Asociación Lagares Vivo, Amigos da Terra e Greenpeace convidámovos a participar nas actividades que con tal motivo imos desenvolver no cauce medio do río Lagares, ás 11:00 horas, na Ponte das Coutadas (rúa Severino Cobas, 244), consistentes en:

  1. Lectura do Manifesto
  2. Sinatura do Manifesto
    1. Colectivos
    2. Participantes
  3. Recollida de lixo no Lagares
  4. Identificación de Plantas Alóctonas (Foráneas)

Dado que se realizará unha limpeza do río, cómpre traer botas de auga e luvas por parte dos asistentes.

Un afectuoso saúdo,

Os Verdes – Galicia Federación, Equo – Galicia, Asociación Lagares Vivo, Amigos da Terra e
Greenpeace.

Cartel do día mundial do medio ambiente
Cartel do día mundial do medio ambiente

Comunicado oficial

O pasado 11 de marzo un novo verquido afectou ao río Lagares na zona do seu nacemento, próximo a Lagoa Mol. Tratouse dun verquido de aceite e fuel que, malia a rápida actuación dos servizos municipais, autonómicos e do Seprona, non se puido evitar que se trasladase á citada lagoa, tal e como puidemos comprobar na visita que directivos de Lagares Vivo realizamos á zona afectada dous días despois, o 13 de marzo (ACHEGAMOS FOTOS). En conversa con veciños da zona, puidemos saber que, sempre segundo estes veciños, a posible orixe do verquido ten a ver con depósitos de aceites industriais soterrados por unha empresa da zona vendida a outra firma, a cal, descoñecedora da existencia deles, procedeu a movementos de terra que os picaron, soltando así o seu contido.

Dende Lagares Vivo queremos facer público:

  1. Os nosos parabéns aos diversos axentes que rápidamente actuaron sobre a zona contaminada, retirando as aves contaminadas e colocando as barreiras anticontaminación. Porén, advertimos que esta última medida non foi todo o eficaz que deberá ser, xa que a mancha conseguiu propagarse, se ben minimizada.
  2. O completo silencio posterior ao suceso. Tras a información de FARO DE VIGO o día posterior ao verquido, nada máis se soubo nin das actuacións destinadas a identificar os culpables nin da evolución posterior da mancha, nin dos efectos sobre os seres vivos, nin da composición exacta dos aceites…nada. Queremos saber que hai de certo nas manifestacións realizadas polos veciños aos que tivemos acceso, que actuacións se prevén para recuperar o ecosistema, porque aínda que a mancha xa non se vexa, os seus compostos xa están incorporados polos seres vivos, e cal é a composición química da aceite e que consecuencias poden ter.
  3. Nada se sabe tampouco do grave verquido do 23 de marzo de 2014. Malia as nosas xestións no Valedor do Pobo e nos xulgados, a cidadanía segue a ignorar que substancia foi a que matou numerosos peixes e anfibios nese verquido para desaparecer sen deixar rastro e quen foi o responsable do mesmo. Tampouco obtivemos resposta ningunha do Concello á nosa petición de sinalización e panel informativo na ponte medieval de Balaídos.
  4. O noso río, que podía xenerar unha senda verde de 17 km ao longo do municipio vigués, segue a sufrir cada ano agresións intolerables das cales case nunca se identifica e castiga aos responsables. O Concello solicitará a Xunta a transferencia das competencias sobre el (FARO DE VIGO, 6-2-2016), pero nós preguntámonos: Para que? Vai redundar iso nun mellor coidado do río? Cales son os plans que ten o Concello se logra a transferencia? A cidadanía de Vigo merece saber cal é o obxectivo que persegue o Concello con esa cesión de competencias, especificando as actuacións concretas que se pretenden realizar, partidas orzamentarias estimadas e prazos previstos.

Alegacións novo proxecto sendeiro Cabral‏

No Boletín Oficial de Pontevedra do pasado 23 de abril saíu publicado o proxecto da Comunidade de Montes de Cabral da construción dun sendeiro ao longo do río Lagares na parroquia de Cabral, do Parque de Valadas á rúa Manuel Álvarez. Unha vez tivemos acceso ao mesmo en Augas de Galicia e tras a súa análise, decidimos dar os seguintes pasos:

1. Congratulámonos e felicitamos aos responsables de que varias das nosas alegacións ao primeiro proxecto foran recollidas neste estudo, o cal, ao noso entender, mellora notablemente este proxecto con respecto ao anterior. Entre elas salientan a eliminación de especies invasoras, o abandono da idea de plantar 1.600 pés de salgueiro chorón, o plano de conservación e a sinaléctica referida á especie endémica galega Narcissus cyclamineus.

2. Porén, malia estas innegables melloras, hai puntos que aínda son mellorables. A tal efecto, consideramos preciso presentar as catro alegacións que resumimos a continuación:

2.1 Solicitamos que o cálculo do camiño de servidume se realice en base a un punto de máxima avenida considerado como a maior crecida existente da que se teña constancia nos rexistros de Augas de Galicia.

2.2 Tamén solicitamos que os traballos de roza previstos respecten o bosque de ribeira nunha franxa mínima de 3 metros, así como a diversas especies vexetais de alto valor ecolóxico. Consideramos que as reforestacións deben respectar as liñas naturais de localización das árbores con respecto ao río, e pensamos que os 48 pés de salgueiro chorón e catalpa poden ser substituídos, todos ou en parte, por carballo do país.

2.3 A instalación de cartelería que prohíba expresamente a circulación de vehículos a motor polo sendeiro.

2.4 A minimización do emprego do xabre e evitar os movementos de terras.

A construción dun sendeiro verde ao longo de todo o río é unha das nosas demandas. O que queremos é que este se leve a cabo do mellor xeito posible.