Xa comentamos en anteriores post a nosa petición sobre a ponte de Castrelos ou ponte de Balaidos. Agora tamén podemos compartir con vos que dita petición chegou á prensa: hoxe no Faro de Vigo
noticias
Rexistrada solicitude sobre a ponte de Castrelos
Bo día,
O pasado xoves 16 de abril, dende a Asociación Lagares Vivo vimos de rexistrar unha petición no Concello de Vigo dirixida ao Departamento de Patrimonio Histórico, relativa á actual situación da ponte medieval de Castrelos ou de Balaídos co seguinte texto:
No barrio de Balaídos, entre bloques de edificios, sitúase unha das xoias arqueolóxicas de Vigo: a ponte medieval de Balaídos ou de Castrelos. Trátase dunha ponte de orixe medieval, declarada Ben de Interese Cultural en 1991, que conserva a calzada e dous piares cónicos a ambos os lados da entrada, con dous tallamares a cadanseu lado e de fermosa fasquía.
Porén, o estado deste valioso referente do patrimonio vigués é moi mellorable. Completamente descontextualizada por mor do urbanismo salvaxe dos anos 70, o río xa non pasa por embaixo dela. Unha reixa sen máis illa a ponte das veciñas e veciños da cidade, sen ningún tipo de información sobre o seu valor, e os graffitis están presentes nalgunhas partes da mesma. Urxe, xa que logo, unha exhaustiva limpeza e sinalización que poña en valor esta construción.
E, XA QUE LOGO, SOLICITA:
1. Unha correcta sinalización da mesma, con sinaléctica axeitada que informe, cando menos, do seu carácter de Ben de Interese Cultural e das características arquitectónicas e históricas máis salientables que a singularizan.
2. Unha profunda limpeza que elimine todo rastro de graffitis e outros elemento non desexados que deterioran a súa imaxe.
3. Unha campaña de posta en valor da ponte que fomente o seu coñecemento por parte da cidadanía.
Feliz día do libro
Boas noites a todos,
Ainda que é un pouco tarde Lagares Vigo non se esquece de que hoxe é o día do libro.
Compartide todos un pouco de cultura que o saber non ocupa lugar…
A loita política continua…
LAGARES VIVO MANTÉN UNHA REUNIÓN CO PARTIDO POLÍTICO OS VERDES GALICIA:
Dentro da nosa xeira de reunións de traballo cos distintos partidos políticos que optarán á alcaldía de Vigo nas vindeiras eleccións municipais, o pasado día 7 de febreiro mantivemos unha xuntanza cunha delegación de Os Verdes Galicia, encabezada polo seu Secretario de Organización, Xosé Manuel Ledo.
Na devandita xuntanza trasladámoslle as mesmas propostas encol da rexeneración e recuperación do río Lagares que no seu día foron trasladadas a Compromiso por Galicia e que podedes consultar no correspondente post.
A sintonía foi grande e dende Os Verdes Galicia comprometéronse a nos enviar o seu programa electoral de cara as muncipais. Cando o recibamos, valoraremos o grao de inclusión das nosas propostas no mesmo.
Lagares Vivo é de interese político
O partido político Compromiso por Galicia púxose en contacto con Lagares Vivo co obxectivo de recabar ideas que poidan incluír no seu programa electoral de cara as vindeiras eleccións municipais. Dende Lagares Vivo fixémoslles chegar as seguintes propostas:
PROPOSTAS SOBRE O RÍO LAGARES PARA A SÚA INCLUSIÓN NO PROGRAMA ELECTORAL DE COMPROMISO POR GALICIA
- Declaración do curso alto do río como Espazo Natural de Interese Local.
- Posta en valor da ponte medieval de Castrelos: limpeza das pintadas e colocación de paneis informativos que informen das súas características e historia.
- Na zona de Chan das Ras (Cabral) florece entre febreiro e marzo a especie Narcissus cyclamineus, auténtica xoia botánica do río Lagares, xa que se trata dun endemismo do suroeste de Galicia e noroeste de Portugal. Instalación de paneis informativos no lugar citado para informar aos visitantes da existencia e características desta especie.
- O tramo do río que transcorre pola parroquia de Lavadores é o que ofrece peor estado, ata o estremo de que en boa parte del é imposible o acceso ao río. Debe de acometerse con carácter urxente un plano de recuperación e rexeneración do río neste tramo.
- A cantidade e intensidade dos verquidos que sofre o noso río é completamente intolerable. É preciso un plano de prevención e vixilancia que inclúa, como mínimo, os seguintes puntos:
- A conexión das casas á rede de residuais para evitar verquidos fecais e de deterxentes.
- O selado de tuberías que dan ao río e a eliminación dos focos de polución.
- Control sobre as industrias para que cumpran coa normativa de tratamentos de residuos.
- Implementación de tecnoloxías limpas nesas mesmas industrias.
- Control exhaustivo da calidade das augas e do ecosistema fluvial, mediante análises periódicas.
Principais actuacións no ano 2014
Neste ano que finaliza, na Asociación Lagares Vivo centramos a nosa actividade reivindicativa en dúas frontes principalmente:
- O verquido acontecido no noso río o día 23 de marzo acabou coa vida de milleiros de peixes e anfibios. Perante a falta de respostas satisfactorias por parte das autoridades competentes, que non foron quen de determinaren tantos aos culpables como a substancia contaminante, dende Lagares Vivo decidimos presentar unha queixa no Valedor do Pobo e no Valedor do Cidadán. Ambos os dous admitiron a trámite a nosa queixa, iniciándose unha investigación para determinar en que medida a actuación das administracións foi todo o eficaz que cómpre agardar. En breve, publicaremos aquí un resumo das comunicacións que recibimos por parte destas dúas institucións.
- O 17 de setembro foi publicado no Boletín Oficial da provincia de Pontevedra o anuncio da realización dunha senda paralela ao Lagares por parte da Comunidade de Montes Veciñais e en Man Común de Cabral. Inmediatamente, presentámonos en Augas de Galicia para coñecérmonos de primeira man o tipo de actuación que se pretende levar a cabo. Desgrazadamente, comprobamos como, o que en principio resultaba ser unha boa idea, facíase de xeito absolutamente neglixente, ás presas e sen ningunha garantía medioambiental: repoboacións caóticas con especies foráneas, desbroces masivos, carencia de plans de mantemento e conservación… Ademais, tivemos constancia de que as obras xa empezaran co proxecto en fase de alegacións, polo que carecían do permiso preceptivo. Xa que logo, presentamos as correspondentes alegacións e queixas en Augas de Galicia, as cales axudaron, xunto con outras presentadas por particulares e outros colectivos, a que as obras fosen paralizadas polo Concello de Vigo. Tamén habemos publicar aquí mesmo o texto íntegro das nosas alegacións.
E pra rematar non nos esquecemos de desexarvos a tod@s un bo ano 2015.
Dereitos Humanos
Hoxe fai 66 anos da recollida dos Dereitos Humanos. Parecenos evidente que en moitos paises non se cumplen estos 30 dereitos.
Deixamos un link a un ilustrativo video sobre os Dereitos Humanos.
E pra que tod@s pensemos sobre o tema e podamos recoller as vosas opinions, unha pregunta ¿Pensades que en España estanse cumprindo todolos Dereitos Humanos?
Noticia no Faro de Vigo
Aproveitamos este día para compartir con tod@s a noticia publicada hoxe no xornal Faro de Vigo. Unha noticia que afecta de cheo a contorna do río Lagares na zona de Cabral.
URBANISMO RECHAZA O RECURSO DA COMUNIDADE DE MONTES DE CABRAL POR O BLOQUEO DO PASEO DO LAGARES
Comezamos
Neste fin de semana, comezamos a nosa andadura na inmensidade de Internet. Presentamos a nosa web, nela iremos publicando artigos, noticias, links e outros datos de interese.
Sabemos que, agora mesmo, é unha web modesta xa que temos escasos recursos. Na medida que poidamos e ca axuda dos asociados, colaboradores, vigueses e público en xeral esperamos poder medrar e ter gran presenza. Non será cousa de dous días pero apreciamos a vosa paciencia.
So quedanos por decir benvidos a todos e grazas por acompañarnos na andadura por un Lagares mellor.
Lagares Vivo
Lagares Vivo 